Şirkət

Bakcell Azərbaycanda mobil rabitə xidmətlərini göstərən ilk şirkətdir.

7500-dən artıq baza stansiyası vasitəsilə Bakcell şəbəkəsi əhalinin 99%-ni, ölkə ərazisinin isə 93%-ni (işğal olunmuş ərazilər istisna olmaqla) əhatə edir.

Azərbaycan iqtisadiyyatının qeyri-neft sektorunun ən iri investorlarından biri olan Bakcell 3 milyondan artıq abunəçini geniş çeşidli və yüksək keyfiyyətli müasir telekommunikasiya xidmətləri (zəng və mobil internet) ilə təmin edir.

Ən son texnologiyalar və Azərbaycanın ən keyfiyyətli 4G şəbəkəsinə iri həcmli sərmayələrin yatırılmasından ibarət olan uzunmüddətli strategiya sayəsində, bu gün Azərbaycanın bütün şəhər və rayonlarında (Naxçıvan Muxtar Respublikası və işğal olunmuş ərazilər istisna olmaqla) yaşayan Bakcell abunəçiləri şirkətin təqdim etdiyi keyfiyyətli və yüksək sürətli mobil İnternet xidmətlərindən yararlanmaq imkanına malikdirlər.

Bakcell şirkəti Bakı metrosunda 4G internet xidmətlərini göstərən ilk mobil operatordur.

Azərbaycanın “Ən sürətli mobil internet xidməti” və “Sınaq nəticələrinə görə ən üstün şəbəkə”

“Bakcell”in təmin etdiyi keyfiyyətli mobil İnternet xidmətlərinə beynəlxalq səviyyədə də yüksək qiymət verilir. Belə ki, 2018-ci ildə Bakcell “Azərbaycanın ən sürətli mobil şəbəkəsi” adına layiq görülüb. Bu mükafat Şirkətə “Speedtest” xidmətinə görə bütün dünyada tanınan “Ookla” şirkəti tərəfindən təqdim edilib. 2017-ci ildə isə mobil rabitə şəbəkələrinin müqayisəli testləri (bençmarkinq) sahəsində beynəlxalq lider və ən etibarlı müstəqil təşkilat olan “P3 Communications” şirkəti tərəfindən Bakcell şirkəti Azərbaycanda “sınaq nəticələrinə görə, ən yaxşı şəbəkə” adına layiq görülüb (“Best in Test”).

İnnovativ və rəqəmsal müştəri təcrübəsi

Yerli mobil telekommunikasiya sənayesində ən vacib İLKlərə imza atan Bakcell müasir rabitə xidmətləri istifadəçilərini onların arzu və tələblərini qarşılamaq üçün yaradılmış ən son həllər və yeniliklərlə təmin edir. 2018-ci ildə Bakcell ölkənin telekommunikasiya bazarında ilk və ən innovativ müştəri xidməti aləti olan – “Mənim Bakcellim” applikasiyasını təqdim edib.

“Mənim Bakcellim” virtual müştəri xidməti tətbiqetməsi sayəsində nömrə ilə bağlı məlumat almaq və yaxud müxtəlif əməliyyatlar etmək üçün xidmət mərkəzinə getməyə və ya məlumat mərkəzinə zəng etməyə ehtiyac qalmır. Beləliklə də, Bakcell abunəçiləri bazarda ən rahat, şəffaf və asan müştəri təcrübəsini qazanmış olurlar.

Bundan əlavə, ölkənin ən geniş-miqyaslı loyallıq proqramlarından biri hesab olunan “Ulduzum” proqramını həyata keçirməklə Bakcell öz müştərilərini eksklüziv endirim və üstünlüklərlə təmin edir.

Etibarlı biznes tərəfdaşı

Bakcell şirkəti hazırda müxtəlif sahələri təmsil edən minlərlə korporativ müştəriyə xidmət edir. Bakcell ölkə iqtisadiyyatının bir çox sektoru üzrə ən böyük korporativ telekommunikasiya xidmətlərinin təminatçısıdır. Şirkət Azərbaycanda fəaliyyət göstərən yerli və beynəlxalq şirkətləri ən yüksək keyfiyyətli telekommunikasiya həlləri ilə təmin edir. “Bakcell”in peşəkar komandası şirkətlərə, dövlət qurumlarına və digər təşkilatlara mobil telekommunikasiya sahəsində istənilən növ xidməti göstərməyə hazırdır. Bakcell özünün korporativ abunəçilərinə təhlükəsiz və etibarlı rabitə təqdim etməklə daha effektiv fəaliyyət göstərməkdə, müştəriləri ilə əməkdaşlıq və sıx ünsiyyət qurmaqda onlara dəstək göstərməklə ölkə iqtisadiyyatının və ümumi biznes sektorunun inkişafına töhfə verir.

Korporativ Sosial Məsuliyyət

Bakcell artıq 10 ildir ki, ölkənin ən genişmiqyaslı Korporativ Sosial Məsuliyyət (KSM) proqramlardan biri olan “Bakcell Stars” proqramını həyata keçirir.

Şirkət bir sıra yerli və beynəlxalq qeyri-hökümət təşkilatları ilə əməkdaşlıq edərək, xüsusi qayğıya ehtiyacı olan uşaqlar, valideyn himayəsindən məhrum olmuş və aztəminatlı ailələrdən olan uşaq və gənclərə dəstək göstərir.

Özünün genişmiqyaslı korporativ sosial fəaliyyətinə görə seçilən Bakcell şirkəti, Azərbaycan gənclərinin təhsili və peşəkar inkişafını diqqət mərkəzində saxlayır və gənc mütəxəssislərin, aztəminatlı ailələrdən olan gənclərin və digər həssas əhali qrupların nümayəndələrinin məşğulluğunun inkişaf etdirilməsinə böyük töhfə verir.

Həmçinin, informasiya texnologiyaları vasitəsilə qadınların liderlik bacarığının artırılması da Bakcell şirkətinin KSM strategiyasının mühüm hissəsidir.

Bakcell ölkədə startapların inkişafına yönəlmiş layihələrinin həyata keçirilməsini dəstəkləyən ilk şirkətlərdən biri olub. “AppLab” proqramının fəaliyyətə başladığı 2014-cü ildən bəri müxtəlif avadanlıq və proqram təminatlarının tərtibi ilə məşğul olan yerli developerlər öz ideyalarını həyata keçirmək üçün “Bakcell”dən dəstək alırlar. “AppLab” layihəsinin iştirakçıları şirkətin “AppLab” Mərkəzində təqdim olunan pulsuz İnternet, masa və təlim otaqları ilə yanaşı üzərində işlədikləri proqram təminatı və cihazların inkişaf etdirilməsi və sınaqlardan keçirilməsi üçün tələb olunan ən son avadanlıqlardan yararlanmaq imkanına malikdirlər.

Bundan əlavə, 2018-ci ildən etibarən şirkət Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin INNOLAND İnkubasiya və Akselerasiya Mərkəzi yerli startaplar üçün birgə inkubasiya proqramı həyata keçirir.

  • 1994 – GTİB şirkəti və Azərbaycan Respublikası Rabitə Nazirliyi tərəfindən birgə müəssisə kimi təsis olunub və Analoq Tipli Sistem Operatoru (ETACS) kimi fəaliyyətə başlayıb.
  • 1996 – mobil telekommunikasiya xidmətləri göstərməyə başlayıb.
  • 1999 – Rouminq xidməti abunəçilərin istifadəsinə təqdim edilib.
  • 2003 – şirkətin özəlləşmə prosesi uğurla başa çatıb. 2004-cü ilin yanvar ayından başlayaraq Bakcell 100% şəxsi kapitala malik şirkət kimi fəaliyyət göstərir.
  • 2007 – Billinq/CRM həlləri üçün 9 milyon avroya yaxın investisiya yatırılıb.
  • 2009 – Mobil şəbəkənin əhatə dairəsinin genişləndirilməsinə 20 milyon avrodan çox investisiya qoyulub.
  • 2009 – “Bakcell Stars” adlı Korporativ Sosial Məsuliyyət proqramına start verilib.
  • 2009 – Rebrendinq prosesi həyata keçirib.
  • 2011 – 3G texnologiyası əsasında xidmətlər təqdim edilib.
  • 2011 – 40 milyon manat həcmində istiqraz buraxılıb.
  • 2012 – Naxçıvan Muxtar Respublikası ərazisində 3G texnologiyası əsasında xidmətlər təqdim etmək üçün lisenziya alınıb.
  • 2012 – Mançester Yunayted futbol klubu ilə tərəfdaşlıq müqaviləsi imzalanıb.
  • 2013 – “Ulduzum” loyallıq proqramı təqdim olunub.
  • 2014 – Bakcell Mobil Nömrə Daşınması (MND) sisteminə qoşulub.
  • 2014 – “Bakcell”in brend smartfonu təqdim edilib.
  • 2014 – Qualcomm ilə əməkdaşlıqda gənc developerlər və startaplar üçün “AppLab” İnkubasiya proqramı yaradıb;
  • 2015 – Azərbaycanda ilk dəfə olaraq 4G LTE texnologiyası əsasında kommersiya xidmətləri təqdim edilib.
  • 2015 – Azərbaycanda ilk dəfə olaraq saniyədə 225 meqabitə qədər LTE-A sürəti təqdim edilib.
  • 2016 – “Bakcell Business” adlı rebrendinq olunmuş korporativ təkliflər portfelini təqdim edib
  • 2016 – Bakcell “UEFA U-17 Avropa çempionatı Azərbaycan 2016”nın rəsmi sponsoru olub
  • 2017 – “Bax nələr mümkündür” adlı yeni brend mövqeyi elan edildi
  • 2017 – Bakcell işğaldan azad edilmiş Cəbrayıl rayonunun Cocuq Mərcanlı kəndində mobil rabitə şəbəkəsini təkmilləşdirib.
  • 2017 – Azərbaycanda ilk dəfə 5G texnologiyasına hazırlığı və 4.5G Pro ilə 1 Gb/saniyəyədək rekord sürəti nümayiş etdirib.
  • 2017 – Bakcell 4G LTE xidmətini Gəncə şəhərində istifadəyə verib və bununla da 4G xidmətlərini ölkənin bütün regionlarına doğru genişləndirməyə başlayıb.
  • 2017 – Bakcell Azərbaycanda ilk dəfə olaraq “HD Voice” texnologiyasını istifadəyə verib.
  • 2018 – Bakcell Azərbaycanda ilk dəfə metroda 4G xidmətini təqdim edib.
  • 2018 – Rəqəmsal Ticarət Qovşağının beynəlxalq konfransında dünyada ilk dəfə olaraq mobil rezidentlik təqdim edib.
  • 2018 – “Bakcell”in baş sponsorluğu ilə Bakıda M.A.P. festivalı keçirilib
  • 2018 – Bakının mərkəzində tam yeni üslubda ilk Bakcell konsept mağazası istifadəyə verilib
  • 2018 – Ölkənin telekommunikasiya bazarında ilk dəfə olaraq ən innovativ və unikal müştəri xidməti aləti – “Mənim Bakcellim” applikasiyası təqdim olunub.
  • 2018 – Bakcell və INNOLAND arasında əməkdaşlıq müqaviləsi imzalanıb.
  • 2019 – “Bakcell”in 4G şəbəkəsi bütün ölkə ərazisini əhatə edib.
  • 2019 – Bakcell Formula 1 Azərbaycan Qran Prisinin ilk rəsmi dəstəkçisi olub.
  • 2019 – Bakcell Azərbaycanın ilk blokçeyn hackathon yarışmasını keçirib.

  • 2009 – Caspian Energy Award: İlin telekommunikasiya şirkəti
  • 2010 – Azeri Business Award: “Texnologiya üzrə ilin lideri”
  • 2010 – Azeri Business Award tərəfindən “İlin KSM lideri” mükafatı
  • 2010 – Uğur Mükafatı: “Ən tez inkişaf edən şirkət”
  • 2012 – Ən yaxşı televiziya reklamı mükafatı: McCann tərəfindən hazırlanmış “Ulduzlar xidmətinizdə” adlı reklama görə
  • 2012 – “Asiyanın ən Uğurlu İşəgötürən Brendi” nominasiyasında ”Asiyanın ən uğurlu işəgötürən şirkəti”
  • 2012 – “Bakı Kristal Zalı”nı binadaxili mobil rabitə sistemi ilə təchiz etdiyinə görə, “GTB İnnovasiya Mükafatı 2012” ilə təltif edilib
  • 2012 – Media mükafatı: “Ən aktiv sponsor”
  • 2015 – Bakcell şəbəkəsi 2015-ci ilin “Ən Yaxşı Mobil Şəbəkəsi” adına layiq görülüb və “Business Time” jurnalının təsis etdiyi “Azeri Business Award” Milli Mükafatı ilə təltif olunub.
  • 2015 – Bakcell Ulduzum “Telecoms World Middle East Awards 2015” mükafatının təqdimetmə mərasimində “Telecoms World” təşkilatı tərəfindən “Ən yaxşı istehlakçı xidməti” adına layiq görülüb.
  • 2015 – AMCHAM tərəfindən 3 nominasiyada “CSR Excellence” mükafatına layiq görülüb
  • 2017 – OOKLA şirkəti tərəfindən “Azərbaycanın ən sürətli mobil rabitə şəbəkəsi 2016” mükafatına layiq görülüb.
  • 2017 – Bakcell şəbəkəsi “P3 Communications” şirkəti tərəfindən Azərbaycanda “Best in Test” (sınaq nəticələrinə görə, ən yaxşı) adına layiq görülüb.
  • 2018 – OOKLA şirkəti tərəfindən “Azərbaycanın ən sürətli mobil şəbəkəsi” adına layiq görülüb.
  • 2019 – Bakcell şirkəti Azərbaycanda ilk dəfə təşkil olunan “Milli KSM Mükafatı 2018″ mükafatına layiq görülüb
  • 2019 – “Gənc sahibkarlara dəstək üzrə ilin layihəsi” nominasiyasında “Ən uğurlu KSM layihəsi” mükafatı alıb.