Balans artırılması

Mobil telefonların qeydiyyatının aparılması ölkəmizin mobil rabitə sahəsində mövcud olan bir neçə problemə qarşı eyni zamanda təsirli mübarizə aparmaq imkanı yaradır. Bu xidmət aşağıda qeyd edilmiş problemlərin baş verməsi hallarını aradan qaldırır:

• Mobil telefonların oğurluq halları;
  
• Qeyri-qanuni idxal və qaçaqmalçılıq;
• IMEI kodların saxtalaşdırılması və ya klonlaşdırılması.

Mobil telefonların IMEI kodlarının qeydiyyatı əməliyyatını bir neçə vasitə ilə həyata keçirmək olar. Bu baxımdan qeydiyyat Azərbaycan Respublikası gömrük orqanları və yaxınlıqdakı poçt şöbələri tərəfindən aparıla bilər. Mobil telefonunun qeydiyyatını həyata keçirmək istəyən şəxs yuxarıda qeyd edilən mərkəzlərə yaxınlaşaraq onlara təqdim edilən ərizə formasını doldurmalıdır.

Şəxsi istifadə məqsədi ilə ölkə ərazisinə mövcud qanunvericiliyə müvafiq olaraq gətirilən hər bir mobil cihazın IMEI nömrəsi ən geci 30 (otuz) gün müddətində tələb olunan sənədlər təqdim edilməklə qeydiyyatdan keçirilməlidir. Yeni gətirilən cihazdan istifadə edildikdə, həmin cihaza mesaj göndəriləcək və 30 gün ərzində qeydiyyatdan keçirilməsi bildiriləcəkdir. Tələb olunan müddət bitdikdən sonra, mobil cihaz qeydiyyata alınmazsa, onun IMEI nömrəsi qara səhifəyə daxil ediləcəkdir. Abunəçilərə rahatlıq yaradılması məqsədi ilə www.imei.az internet səhifəsinin yaradılmışdır ki, abunəçilər istifadə edəcəkləri mobil cihazların IMEI nömrələri barədə məlumatları həmin Internet səhifəsindən əldə edə biləcəklər.

IMEI kod (International Mobile Equipment Identity - Mobil cihazın beynəlxalq tanınması) konkret bir cihazın və onun modelinin tanınmasını təmin edir. Kod 15 rəqəmdən ibarətdir və başqa cihazlardakı tanınma kodları ilə heç vaxt üst üstə düşməməlidir. Kodun ilk altı rəqəmi telefon modelini bildirir. Növbəti iki rəqəm istehsalçı ölkənin kodudur.

Ondan sonrakı altı rəqəm telefonun seriya nömrəsidir. Kodun son rəqəmi ehiyat təyinedicidir, hansı ki əvvəlki rəqəmlər əsasında xüsusi alqoritmlə hesablanır.

Mobil telefonunuzun IMEI kodunu təyin etmək üçün telefonunuzun ekranında *#06# yığmağınız kifayətdir. Bu kod mobil tefonun qutusu üzərində də qeyd olunur.

Hal-hazırda və ya uzun müddətdir istifadə etdiyiniz mobil telefon və ya telefonları qeydiyyatdan keçirməyə ehtiyac yoxdur. Çünki sizin mobil telefonunuz avtomatik olaraq qeydiyyatı alınmış telefonlar siyahısına daxil edilir.

Satış və digər sahibkarlıq fəaliyyəti* məqsədi ilə mobil cihazları ölkəyə idxal edən bütün hüquqi və fiziki şəxslər idxal etdikləri mobil telefonları qeydiyyatdan keçirməlidir.

* Telefondan şəxsi istifadə, xidmət məqsədləri üçün istifadə və s. nəzərdə tutulur.

Əgər ərizəçi fiziki şəxs kimi idxal etdiyi mobil telefon şəxsi istifadə üçün nəzərdə tutubsa, həmin şəxs aşağıdakı sənədləri təqdim etməlidir:

• Şəxsiyyətini təsdiq edən sənədin surəti (Əslini göstərməklə);
  
• Telefonun özü (markasını, modelini və IMEI kodunu bildirməklə);
• Müvafiq ərizə forması.

Satış və digər sahibkarlıq fəaliyyəti məqsədi ilə mobil cihazı idxal edən hüquqi şəxsdirsə:

• Dövlət qeydiyyatı barədə sənədin surəti;
  
• Şəxsiyyətini təsdiq edən sənədin surəti (Əslini göstərməklə);
• Vergi orqanları tərəfindən uçota alınması haqqında şəhadətnamənin surəti;
• Uyğunluq sertifikatının surəti. (Bütün sənədlərin əslini göstərməklə).

Satış və digər sahibkarlıq fəaliyyəti məqsədi ilə idxal edilmiş bütün mobil telefonların qeydiyyatı zəruridir. Şəxsi istifadə məqsədi üçün ölkəyə gətirilmiş telefonlar 30 gün ərzində qeydiyyatdan keçirilir.

Qeydiyyat üçün müraciət ərizəsinə 3 iş günü ərzində baxılır.

Təqdim etdiyiniz sənədlərdə heç bir çatışmamazlıq aşkarlanmadıqda (“Mobil cihazların qeydiyyatının aparılması Qaydası”na uyğun olaraq) telefonunuzun IMEI kodu qeydiyyata alınacaq. Əks halda isə mobil cihazınız bağlanacaq.

Şəxsi istifadə məqsədi ilə ölkəyə gətirilən mobil cihazların hər bir İMEİ nömrəsinin qeydiyyatı 5 (beş) manat təşkil edir.

• Telefon müvafiq qaydalar əsasında vaxtında qeydiyyatdan keçməsə;
• Qaçaqmalçılıq yolu ilə ölkəyə gətirilərsə;
• Telefon itirildiyi və yaxud oğurlandığı halda;
• Qeydiyyat zamanı ərizədə göstərilən mobil cihazın IMEI kodunun, qeydiyyatı keçirilən telefonlar siyahısında mövcudluğu və ya surətinin köçürülməsi halı aşkarlanarsa;

mobil cihazın fəaliyyəti dərhal dayandırılacaq.

IMEI kodlardan hansının orijinal mobil telefona aid olub-olmamasını isə Qeydiyyat Mərkəzi müvafiq prosedura əsasında təyin edəcək.

Mobil telefonunuzu yalnız oğurlandığı və itirildiyi hallarda bağlatdıra bilərsiniz. Hüquq Mühafizə orqanları tərəfindən verilmiş, yuxarıdakı halları təsdiq edən arayış və şəxsiyyətinizi təsdiq edən sənədi Bakcell Müştəri Xidmətləri Mərkəzinə təqdim etməklə siz 24 saat ərzində telefonunuzun fəaliyyətinin bağlatdıra bilərsiniz. Bu xidmət üçün heç bir ödəniş tələb olunmur.

Azərbaycan ərazisinə GSM standartlarına uyğun olmayan gətirilmiş telefonlar sağlamlıq üçün təhlükə törədə, müxtəlif tezliklərdə işləyə, digər tezliklərdə işləyən telefonların iş fəaliyyətini əngəlləyə, IMEI kodları asanlıqla dəyişdirilə və tezliklə sıradan çıxa bilər. Lakin bu günədək istifadə etdiyiniz telefonunuzun orijinal olub-olmamasından asılı olmayaraq həmin telefon avtomatik olaraq qeydiyyata alınan telefonlar siyahısına daxil ediləcək.

Əgər yeni gətirdiyiniz telefon standartlara cavab vermirsə o zaman qeydiyyat üçün müraciət edərkən telefonunuzun beynəlxalq GSM standartlarına uyğunluğu, orijinal olması, IMEI kodunun həqiqiliyi yoxlanıldıqdan sonra telefon qeydiyyata alına bilər. Əks halda isə telefonunuz dərhal bağlanacaq.

Əgər hər hansı bir abunəçi (roumer) Azərbaycan Respublikası ərazisində xarici mobil operatorun SİM kartı ilə beynəlxalq rouminq xidmətindən istifadə edirsə, o zaman mobil telefonun qeydiyyata alınmasına heç bir ehtiyac yoxdur.

Müvəqqəti olaraq Azərbaycan Respublikası ərazisində məskunlaşmış xarici ölkə vətəndaşları əgər yerli operatorların xidmətlərindən istifadə edirlərsə, o zaman mobil telefonlarını mütləq müvafiq qeydiyyat nöqtələrində qeydiyyatdan keçirməlidir. Telefon qeydiyyatdan keçirilməzsə, 30 gün ərzində telefonun fəaliyyəti dayandırılır.

“Mobil cihazların qeydiyyatının aparılması Qaydası”na əsasən ölkə ərazisinə gətirilən və qeydiyyatı zəruri olan mobil telefonların sayına məhdudiyyət qoyulmur. Müvafiq prosedura üzrə gömrük rüsumu isə gömrük orqanları tərəfindən tənzimlənir.

Eyni anda iki SİM kart (Duos) dəstəkləyən telefonların iki IMEI kodu mövcuddur. Qəbul edilmiş standartlara əsasən bu kodlar bir-birindən yalnız bir rəqəmlə fərqlənirlər. Qeydiyyat üçün müraciət etdikdə hər şey tam qaydasında olarsa, telefonunuzun hər iki IMEI kodu qeydiyyata alınır.

Abunəçi telefonun itirildiyi və ya oğurlandığı halda müvafiq ərizə ilə polisə müraciət etməlidir. Telefonunuzun məhdudlaşdırılması zamanı Bakcell Müştəri Xidmətlərinə müraciət etdikdə sizin mobil telefonunuzun IMEI kodu 24 saat ərzində bağlatdırılacaq.

Əgər Sizin telefonunuz iki SİM kartlıdırsa, qəbul edilmiş standarta əsasən digər IMEI kod aktiv qala bilməz. Bu halda hər iki kod nəzərə alınır və telefonunuzun fəaliyyəti dayandırılır.

Qeydiyyat bazası ölkəyə idxal olunan mobil telefonlarının IMEI kodlarının daxil edilməsi ilə genişləndiriləcək. Ölkəyə idxal olunan telefonların qeydiyyatı və nəzarəti gömrük xidməti tərəfindən və mobil operatorun şəbəkəsinə qoşulmaqla həyata keçiriləcək.

Ağ siyahıya – Azərbaycan Respublikasını qanunvericiliyi əsasında qeydiyyata alınmış mobil cihazların IMEI kodları, Beynəlxalq GSM Assosiasiyası tərəfindən təyin edilmiş və dəyişdirilməmiş IMEI kodlar, həmçinin unikal IMEI kodlar daxil edilir.

Qara siyahıya – Ölkə qanunvericiliyinə müvafiq qaydada qeydiyyatı keçirilməmiş mobil cihazların IMEI kodları, qaçaqmalçılıq yolu ilə gətirilmiş mobil cihazların IMEI kodları, itirilmiş və oğurlanmış mobil cihazların IMEI kodları, Beynəlxalq GSM Assosiasiyası tərəfindən qeydiyyata alınmamış mobil cihazların IMEI kodları daxil edilir. Ölkəmizdə qara siyahıda olan cihazların mobil rabitə xidmətlərindən istifadə üçün yararlı deyil.

Boz siyahıya – Hazırda mobil rabitə xidmətləri üçün istifadə edilən və Ağ siyahıda, yaxud Qara siyahıda qeydiyyata alınmayan telefonların IMEI kodları daxil edilir. Boz siyahıda olan mobil cihazların IMEI kodları Ağ və yaxud Qara siyahıya dəqiq araşdırıldıqdan sonra daxil edilir. Qeydiyyat mərkəzi mobil operatorlardan aldığı məlumatlar əsasında Boz siyahıdakı mobil cihazları müəyyənləşdirəcək.

Qeydiyyat zamanı ərizədə göstərilən mobil cihazın IMEI kodunun, qeydiyyatı keçirilən telefonlar siyahısında mövcudluğu və ya surətinin köçürülməsi halı aşkarlanarsa mobil cihaz Qara siyahıya daxil ediləcək və fəaliyyəti dərhal dayandırılacaq. Dayandırılma barədə qeydiyyat mərkəzi abunəçiyə rəsmi məlumat göndərəcək. Əgər mobil telefon mobil şəbəkədə istifadə edilirsə o zaman müvafiq mobil operator abunəçini SMS göndərməklə məlumatlındıracaq.

Bu layihəyə mobil operatorlarla yanaşı dövlət qurumları da (Rabitə və İnformasiya Texnologiyaları Nazirliyi, Ədliyyə Nazirliyi, İqtisadi İnkişaf Nazirliyi, Fövqəladə Hallar Nazirliyi, Standartlaşdırma, Metereologiya və Patentləşdirmə üzrə Dövlət Komitəsi) cəlb edilib.

Sistemin vahid idarəetmə mərkəzi Rabitə və İnformasiya Texnologiyaları Nazirliyində yerləşəcək.

www.imei.az internet səhifəsində mobil cihazınızın IMEI kodunu daxil etməklə öyrənmək mümkündür.

Telefon satışı ilə məşğul olan dükandan aldığınız cihazın qara siyahıya salınıb salınmamasını www.imei.az saytından öyrənə bilərsiniz. Əgər cihaz qara siyahıya salınıbsa, bu cihaz ola bilər ki, ölkəyə qeyri-qanuni yollarla idxal edilib, və ya işlənmiş telefon üzərində bəzi hissə dəyişiklikləri edilərək, yeni kimi satılıb. Bu halda, qara siyahıda olan cihaz alındığı dükana geri qaytarılmalıdır.

Əgər siz mobil cihazınızı vaxtlı vaxtında qeydiyyatdan keçirə bilmədiyiniz halda qara siyahıya salınıbsa, o zaman siz standart qeydiyyat prosedura vasitəsi ilə cihazı qara siyahıdan ağ siyahıya keçirdə bilərsiniz.

Şəhər nömrələrindən 157, mobil nömrələrindən 012157 nömrəsini yığmaqla həftənin 7 günü, saat 9:00 dan 21:00-a kimi məlumat mərkəzi ilə əlaqə yaratmaq olar.

Zəngin qiymətləndirilməsi tarifinizə müvafiq olaraq digər operatora zəng kimi dəyərləndirilir (zəngin tarifikasiya müddəti 60 saniyədir)