download bakcell application logo

Backcell
    Backcell
    Loading...
    icon

    Xəta

    Bakcell fövqəladə hallar barədə SMS xəbərdarlıq xidmətini təqdim edir
    19.03.2014

    Azərbaycanın İlk Mobil Operatoru və Aparıcı Mobil İnternet Provayderi Bakcell şirkəti Azərbaycan Respublikası Fövqəladə Hallar Nazirliyi (FHN) ilə birgə SMS (qısa mesaj) xəbərdarlıq sisteminin yaradılmasını elan edir. Fövqəladə halların əhalinin təhlükəsizliyinə göstərdiyi təsirin azaldılmasına yönəlmiş bu layihə Azərbaycanda ilk dəfə Bakcell tərəfindən həyata keçirilir. Təbii fəlakətlər insanların həyat və sağlamlığına zərər vurur, yaşayış obkeytlərini, qaz və elektrik sistemlərini sıradan çıxarır. Bu baxımdan sosial məsuliyyətli şirkət olaraq, köməyə ən çox ehtiyac duyduqları zaman öz müştərilərinə dəstək olmaq Bakcell üçün çox əhəmiyyətli məsələdir.   Yeni xəbərdarlıq sistemi FHN-nə SMS vasitəsilə müvafiq bölgənin sakinlərini təbii fəlakət və ya fövqəladə hallar barədə dərhal məlumatlandırmaq, əhaliyə isə hər hansı ciddi təhlükə ilə bağlı məlumatı vaxtında alıb daha cəld reaksiya vermək imkanı yaradır. Bu xidmət sayəsində fövqəladə hal zonasında olan Bakcell müştərilərinə təhlükə ilə bağlı dərhal SMS göndəriləcək. Bunun üçün telefonda heç bir xidmətin aktivləşdirilməsinə və ya SMS-i almaq üçün xidmət haqqının ödənilməsinə ehtiyac yoxdur. Xidmət yerli bazarda istifadə olunan bütün telefon modelləri üçün nəzərdə tutulub. “Bakcell”in təqdim etdiyi bu xidmət Azərbaycanda yer və vaxt əsasında çalışan ilk SMS xəbərdarlıq xidmətidir. Təbii fəlakət və fövqəladə hallar üzrə SMS xəbərdarlıq sistemi həm əlaqədar qurumlara, həm də əhaliyə eyni vaxtda eyni SMS xəbərdalığını göndərməklə müvafiq tədbirlərin planlaşdırılmasına kömək edəcək. Sistem FHN-dən fövqəladə vəziyyət barədə məlumatı aldıqdan sonra SMS xəbərdarlığını demək olar ki, dərhal göndərmək imkanına malikdir. “Bugün dünyada geniş yayılmış SMS xəbərdarlıq sistemləri ölkələr tərəfindən əhalinin təhlükəsizliyinin təmin edilməsi üçün istifadə olunur. “Bakcell”in təqdim etdiyi bu xidmət təbii fəlakət və digər fövqəladə vəziyyətlərin yaratdığı problemlərin həllində müvafiq qurumlara və yerli əhaliyə kömək edəcək. Bu sistem fövqəladə vəziyyət zamanı koordinasiya və ictimaiyyətin məlumatlandırılması üçün olduqca effektiv vasitədir. Biz böyük məmnuniyyətlə dövlət qurumları ilə birlikdə təbii fəlakətlərə hazırlıq proqramının hazırlanması istiqamətində iş aparırıq və baş verə biləcək fövqəladə hadisə zamanı abunəçilərimizin əlaqələrinin itməməsini təmin etməyə hazırıq”, deyə Bakcell şirkətinin baş texniki direktoru cənab Yiğit Berktaş bildirib. Bakcell şirkəti bildirir ki, SMS xəbərdarlıq sistemi uğurla sınaqdan keçirilib və istifadəyə tam hazırdır.   *** Bakcell haqqında Azərbaycanın İlk Mobil Operatoru və Aparıcı Mobil İnternet Provayderi Bakcell şirkəti müasir mobil kommunikasiya xidmətləri istifadəçilərinə geniş çeşiddə məhsullar təklif edir. Bakcell, Sür@ ticarət nişanı adı altında öz abunəçilərinə ən mükəmməl 3G mobil internet xidməti göstərir. Ölkənin qeyri-neft sektorunun ən iri investorlarından biri olan Bakcell, ən son texnologiyalar və abunəçilərinə xidmət edən insan resursları vasitəsilə Azərbaycan iqtisadiyyatına böyük həcmdə sərmayə yatırmaqda davam edir. Bakcell şəbəkəsi əhalinin 99%-ni, ölkə ərazisinin isə 93% -ni (işğal olunmuş ərazilər istisna olmaqla) əhatə edir. İnnovasiyalar sahəsində lider olan Bakcell şirkəti öz Sür@ xidməti və yeni əməkdaşlıqlar vasitəsilə Azərbaycan xalqını ən yüksək səviyyəli mobil internet xidmətləri ilə təmin edir. 1000-dən artıq 3G stansiyaları sayəsində “Bakcell”in 3G xidməti əhalinin 80%-ni, ölkə ərazisinin isə 55% -ni (işğal olunmuş ərazilər istisna olmaqla) əhatə edir və bütün bölgələrdə təklif olunur. 300 pərakəndə satış nöqtəsi və paytaxt və bölgələrdə fəaliyyət göstərən 5 Müştəri Xidməti Mərkəzində Bakcell abunəçilərinə ən üstün müştəri xidməti göstərilir. Bakcell və onun məhsul və xidmətləri haqqında ətraflı məlumat əldə etmək üçün, xahiş edirik, www.bakcell.com internet səhifəsinə daxil olun və ya 555-ə zəng edin. Press-relizlərlə tanış olmaq üçün www.bakcell.com/az/news (və ya İngilis dili üçün www.bakcell.com/en/news) səhifəsinə daxil olun. Qeyri-Bakcell abunəçiləri isə 055 0000 555 nömrəsinə zəng etməklə Bakcell-in xidmətləri haqqında məlumat əldə edə bilərlər